Hazrat Ali (A.S) Aur Ghazwa E Khandaq Ki Fatah

بسم اللہ الرحمن الرحیم

Ghazwa e Khandaq: Pas-e-Manzar aur Asbab

Paanch Hijri ka zamana tha. Madinah Munawwarah mein Islam apni bunyadein mazboot kar raha tha, jisay dekh kar Makke ke mushrikeen aur yahood ke dilon mein hasad o bughz ki aag bharak uthi. Quraish-e-Makka, jin ki Badr aur Uhud mein shikast hui thi, apni shikast ka badla lenay ke liye be-taab thay.

Qabail Jo Muttahid Howe

Unhon ne Arab ke tamaam qabail, jin mein Bani Kanana, Bani Saleem, Ghatafan, Ashja’ aur Yahoodi qabaila Bani Nadheer (jinhein Madinah se nikala gaya tha) ko aik azeem ush shaan ittehad, jisay “Ahzaab” kaha jata hai, mein jama kar liya. Is muttahida fouj ki qayadat Abu Sufyan ke haath mein thi aur is ka maqsad sirf aur siwa Islam aur Musalmano ka naam o nishan mita dena tha. Tareekhi riwayat ke mutabiq is lashkar ki tadaad das hazaar se bhi zyada thi.

Hazrat Jibraeel Alayhis Salam ka khatray se agah karna

Hazrat Jibraeel Alayhis Salam ne Rasool Allah Sallallahu Alayhi Wasallam ko is azeem khatray se agah kar diya. Yeh mehez Makka ka lashkar nahi tha, balkay poore Arab ke mushrik quwaton ka ijtimai hamla tha. Hazrat Nabi Akram Sallallahu Alayhi Wasallam ne fori taur par Sahabah Karaam ki aik jungi council bulai taake is qayamat khez khatray ka muqabla karne ki hikmat e amali tai ki ja sake.

Hazrat Salman Farsi (R.A) ka Tareekhi Mashwara

Is mauqa par aik Farsi Sahabi, Hazrat Salman Farsi R.A, jo apni gehri nazar aur tajarbay ke hamil thay, ne arz kiya: “Ya Rasool Allah! Hum Fars (Iran) mein jab mehsoor ho jatay thay to shehar ke gird khandaq khod letay thay taake dushman ka ghora sawar seedha hamla nahi kar sake.”

Munfarid aur naya khayal

Yeh aik aisa munfarid aur naya khayal tha jis ka Arabon ko koi tajarba nahi tha. Arabon ki jungon ka tareeqa rubaru muqabla, neza baazi aur teer andazi tha. Difa ke liye khandaq khodna aik ajnabi harba tha. Hazrat Sallallahu Alayhi Wasallam ne Hazrat Salman Farsi ke is Danishmandana mashwaray ko fori taur par qubool farma liya. Yeh amal Nabi Akram Sallallahu Alayhi Wasallam ki qayadat ki aik aur jahat ko zahir karta hai ke Aap Sallallahu Alayhi Wasallam haq baat ko qubool farma letay thay, chahay woh kisi bhi shaks ki taraf se ho.

khandaq khodnay ka Muqam

Madinah ke shumali, mashriqi aur maghribi janib, jahan se dushman ke hamlay ka imkan tha, aik taweel aur gehri khandaq khodnay ka kaam shuru hua. Hazrat Sallallahu Alayhi Wasallam khud bhi Sahabah Karaam ke saath mil kar matti uthate, pathar tootay aur khandaq khodte. Muhajireen o Ansar mein is qadar jazba aur yakjehti thi ke woh aik doosray se muqabla karte hue kaam kar rahay thay. Khandaq ki lambai taqreeban paanch kilometer, choraai taqreeban no meter aur gehrai paanch meter ke qareeb thi. Yeh aik azeem ush shaan difa’i taameer thi jise Musalmano ne intehai qaleel waqt mein mukammal kar liya.

Lashkar-e-Kuffar ka Madinah par Hamla aur Khandaq se Herat

Jaisay hi lashkar-e-Ahzaab Madinah ke qareeb pahuncha, un ki nazar is azeem khandaq par pari jo un ke aur Madinah ke darmiyan aik na-qabil e guzaris rukawat ban kar khari thi. Woh is harbay se bilkul na-waqif thay. Un ke liye yeh aik nayi aur herat angiz cheez thi. Arabon mein khandaq khod kar larnay ka koi rawaj na tha. Un ke chand bahadur sawar, jin mein Umro Ibne Abdud , Ikrama bin Abi Jahl, Zarar bin al-Khattab, Hubaira bin Abi Wahb aur Nawfal bin Abdullah shaamil thay, agay barhay. Woh Bani Kanana ke gharon ke paas se guzray aur lalkartay hue kaha: “Aey Bani Kanana! Tumhein anqareeb maloom ho jaye ga ke bahadur sawar kaun hain?”

Lekin jab un ki nazar is gehri aur wasee khandaq par pari to woh heran reh gaye. Un mein se aik ne kaha: “Yeh to ajami (ghair Arab) tareeqa hai. Yeh zaroor is Farsi (Salman Farsi) ki saazish hai jo Muhammad (Sallallahu Alayhi Wasallam) ke paas hai.” Majbooran lashkar-e-kuffar ne khandaq ke us paar apna muhasara kiya hua camp laga liya. Muhasara taweel hone laga jo Musalmano ke liye aik shadeed imtihaan ka waqt tha.

Umro Ibne Abdud : Arab ka Na-Qabil-e-Shikast Jangjo

Is lashkar-e-kuffar ka sab se khatarnak aur taaqatwar jangju Umro Ibne Abdud tha. Woh qabaila Bani Aamir bin Lui se talluq rakhta tha aur poore Arab mein us ki shujaat aur jungi maharat ke charchay thay. Us ke baare mein mashhoor tha ke woh tanha aik hazaar sawaron ka muqabla kar sakta hai. Usay “Faris-e-Malil” (Malil ka shehswar) ka khitaab diya gaya tha, kyunke us ne aik dafa maqam Malil ke qareeb Bani Bakr ke aik dastay ko tanha shikast di thi. Woh Jang-e-Badr mein mojood tha lekin zakhmi ho gaya tha, jis ki wajah se woh Jang-e-Uhud mein shareek na ho saka. Ab woh mukammal taur par tandarusht ho chuka tha aur apni poori taaqat aur gharoor ke saath lashkar-e-kuffar ka sab se bara pehalwaan ban kar aaya tha.

Maidan-e-Jang mein Lalkaar aur Hazrat Ali (A.S) ki Aamaadgi

Umro Ibne Abdud apne ghoray par sawar hua aur khandaq ka chakkar laga kar is ka muaina karne laga. Usay khandaq ka aik hissa nisbatan tang mehsoos hua. Us ne apne ghoray ko eidh lagai aur aik chhalang mein khandaq paar kar ke Musalmano ke muhaz ke samnay ja khara hua. Us ne apna neza zameen mein gaadh diya aur gharoor se lalkarna shuru kiya:

“Hal min mubaariz?”

(Kya koi hai jo meray muqablay ke liye aaye?)

Us ke dar aur rab ki wajah se koi bhi Sahabi fori jawab dene ki himmat na kar saka. Woh aik dewaana aur tajarba kar jangju tha. Yeh dekh kar Maula Ali (A.S) uthe, jo us waqt sirf 25 ya 26 saal ke nawjawan thay. Aap ne apni zirah pehni hui thi aur bargah-e-risalat mein haazir ho kar arz kiya:

“Ya Rasool Allah! Main is ke muqablay par jaon ga.”

Rasool Allah Sallallahu Alayhi Wasallam ne farmaya: “Aey Ali! Baith jao, yeh Umro hai.” Yeh farma kar Aap Sallallahu Alayhi Wasallam ne Hazrat Ali ki hifazat aur un ki jawani ka khayal farmaya.

Umro Ibne Abdud ne dobara lalkara aur tanz ke andaz mein kaha: “Kya tum mein se koi mard mojood nahi hai? Tumhari woh jannat kahan hai jis ka tum dawa karte ho ke jo tum mein se mara jaye ga woh is mein daakhil hoga? Aao, main tumhein jannat pahuncha doon.”

Aik baar phir Maula Ali (A.S) ne khare ho kar ijazat maangi, aur aik baar phir Rasool Allah Sallallahu Alayhi Wasallam ne unhein baitha diya. Is ki wajah yeh thi ke Aap Sallallahu Alayhi Wasallam ko Hazrat Fatima Radi Allahu Anha ka khayal tha, jo Jang-e-Uhud mein Hazrat Ali ke zakhmi hone par bohat royin thi.

Teesri baar Umro Ibne Abdud ne lalkara aur fakhriah ashaar parhey jin ka mafhoom tha:

“Main ne pukar pukar kar thakne ki hadd kar di hai… bahaduri aur shujaat kisi jawaan ke behtareen ausaf hain.”

Us ki laaf zani sun kar Maula Ali (A.S) phir uthe aur arz kiya: “Ya Rasool Allah! Ab to main zaroor jaon ga.”

Is baar Rasool Allah Sallallahu Alayhi Wasallam ne muskurate hue farmaya: “Achha jao, yeh Umro hai.”

Maula Ali (A.S) ne fori jawab diya:

Umro un hu? Ana Ali-yyubnu Abi Talib!”

(Woh Umro hai to kya hua? Main Ali bin Abi Talib hoon!)

Yeh jawab sun kar Hazoor Sallallahu Alayhi Wasallam ne ijazat marhamat farma di. Aap Sallallahu Alayhi Wasallam ne apni mubarak haathon se Hazrat Ali ko apni zaati zirah “Zaat-ul-Fudool” pahnai, un ke haath mein Zulfiqar talwar thamai aur apna amama mubarak “Sahaab” un ke sar par bandha, jis ke nau beach latak rahe thay. Jab Maula Ali (A.S) maidan ki taraf chalay to Rasool Allah Sallallahu Alayhi Wasallam ne aasman ki taraf haath utha kar dua farmai:

“Allahumma! Ihfazhu min baini yadaihi wa min khalfihi wa an yameenihi wa an shimaalihi wa min fawqihi wa min tahti hi.”

(Aey Allah! Is ki hifazat farma is ke aagay se, peechay se, daahinay se, baayin se, oopar se aur neechay se.)

Phir Aap Sallallahu Alayhi Wasallam ne woh tareekhi jumla irshad farmaya jis ne is muqablay ke spiritual significance ko hamesha ke liye amar kar diya:

“Baraz-al- Imaanu kulluhu ilash-shirki kullihi.”

(Aaj kule Imaan kule Kufar ke muqablay mein maidan mein ja raha hai.)

Tareeki Muqabla: Guftagu aur Phir Jang

Maula Ali (A.S) maidan mein pahunche to Umro Ibne Abdud ne poocha: “Tum kaun ho?”

Hazrat Ali ne farmaya:

“Main Ali bin Abi Talib hoon.”

Umro ne kaha:

“Tumhare waalid mere dost thay. Tum wapas chalay jao, main tum jaisay nawjawan ko qatal karna nahi chahta.”

Hazrat Ali ne farmaya:

“Lekin main tujhe qatal karna chahta hoon.”

Umro ne israar kiya: “Bhatijay, main tujhe qatal karna nahi chahta. Wapas chala ja.”

Maula Ali (A.S) ne jawab diya:

“Mere ibn-e-amm Muhammad Mustafa Sallallahu Alayhi Wasallam ne mujhe bataya hai ke agar tu mujhe qatal kar de ga to main Jannat mein jaon ga aur tu Dozakh mein jayega. Aur agar main tujhe qatal kar doon to phir bhi tu Dozakh mein jayega aur main Jannat mein jaon ga.”

Umro ne tanz kiya:

“Yeh to badi ajeem taqseem hai!”

Maula Ali (A.S) ne phir usey Islam ki dawat di:

“Main tujhe gawahi dainay ki dawat deta hoon ke Allah ke siwa koi mabood nahi aur Muhammad Sallallahu Alayhi Wasallam us ke Rasool hain.”

Umro ne inkar kar diya. Maula Ali (A.S) ne usey maidan chhod kar janay ka mashwara diya, lekin Umro ne apni “bahaduri” ke shehray aur Arab ki aurton ke taanon ke dar se inkar kar diya.

Aakhir mein, Hazrat Ali Karam Allah Wajhul Kareem ne kaha:

“Phir aao, lekin tum apne ghoray se utar kar paidal muqabla karo.”

Yeh aik jungi chaal thi, kyunke Umro ghora sawar hone ki wajah se faiday mein tha. Umro ne gharoor mein aa kar yeh shart maan li. Us ne apne ghoray ki taangen kaat diyen (aik riwayat ke mutabiq usey haank kar bhaga diya) taake woh peechay hatnay ka koi rasta na rahay.

Faisla Kun Zarb aur Fatah

Muqabla shuru hua. Umro Ibne Abdud ne pehla waar kiya. Us ki talwar ki zarb itni zordar thi ke us ne Hazrat Ali ke khud (helmet) ko kaat dala aur sar mubarak par mamooli sa zakhm aagaya. Phir Hazrat Ali Karam Allah Wajhul Kareem ki baari ai. Aap ne aisi bijli ki tarah tez zarb lagai ke Umro Ibne Abdud ka kandha aur baazu jism se juda ho kar zameen par gir gaya. Aik doosri riwayat ke mutabiq zarb us ki taangon par lagi thi. Woh zameen par gir para.

Hazrat Ali Karam Allah Wajhul Kareem us ke seenay par sawar ho gaye taake us ka sar qalam karein. Itnay mein us bad-bakht ne Hazrat Ali ke chehray mubarak par thook di. Yeh aik intehai zillat aameez harkat thi. Hazrat Ali Karam Allah Wajhul Kareem fori uth khare huay aur usey chhod kar thori dair tehalnay lage.

Jab Umro Ibne Abdud ne is amal ki wajah poochi to Hazrat Ali ne farmaya: “Tum ne mere chehray par thook diya. Main zaati ghussey mein tumhein qatal nahi karna chahta. Main sirf Allah ke liye aur us ke deen ki sar-bulandi ke liye lar raha hoon. Ab jabke mera ghussa thanda ho chuka hai, main tumhein Allah ke liye qatal karoon ga.” Yeh jawab Islami akhlaqiyaat aur jihad fi sabeel illahi ki haqeeqi rooh ki akasi karta hai.

Us ke baad Hazrat Ali Karam Allah Wajhul Kareem ne agay barh kar us ka kaam tamaam kar diya. Is aik fatah ne poore muhasray ka paansa palat diya. Kuffar ke hoslay past ho gaye aur Musalmanon mein aik nayi rooh phoonk di gayi.

Fatah ke Baad ke Waqiaat aur Fazilat ka Aitraaf

Hazrat Ali (A.S) Umro Ibne Abdud ka sar qalam kar ke le kar Rasool Allah Sallallahu Alayhi Wasallam ki khidmat mein haazir huay. Aap Sallallahu Alayhi Wasallam ka chehra mubarak khushi se damak utha. Hazrat Abu Bakr Siddique aur Hazrat Umar Farooq Radi Allahu Anhuma ne uth kar Hazrat Ali ke sar ke boose liye.

Hazrat Umar Farooq Radi Allahu Anhu ne poocha: “Aey Ali! Aap ne us ki zirah kyun nahi utaari, haalan ke yeh poore Arab mein sab se qeemti zirah thi?”

Hazrat Ali (A.S) ne jawab diya:

“Jab woh neem barhana haalat mein tha to main ne usey lootna apne bhai ki izzat ke khilaf samjha. “

Rasool Allah Sallallahu Alayhi Wasallam ne khushi mein irshad farmaya:

“Zarbatu Aliyyin yawmul khandaqi afdalu min ibadatith-thaqalayn.”

(Khandaq ke din Ali ki aik zarb jinnon aur insaano ki ibadat se bhi afzal hai.)

Aik aur riwayat mein hai:

“Lumubarazatu Aliyyibni Abi Taliba Umro ibn Abd-i-Wuddin yawmul khandaqi afdalu min a’maali ummati ila yawmil qiyamah.”

(Khandaq ke din Ali bin Abi Talib ka Umro Ibne Abdud se muqabla qayamat tak meri ummat ke tamaam aamaal se afzal hai.)

Hazrat Huzaifah bin al-Yamaan Razi Allahu Anhu se aik shaks ne Hazrat Ali ki fazilat ke baare mein poocha to unhon ne qasam kha kar kaha:

“Agar Ummat-e-Muhammad Sallallahu Alayhi Wasallam ke nek aamaal, Aadam Alayhis Salam se le kar qayamat tak, aik palray mein rakh diye jayein aur Ali Radi Allahu Anhu ka mehez Khandaq wala amal doosray palray mein rakha jaye to Ali ka palra bhaari ho jaye ga.”

Nateeja aur Asraat

Umro Ibne Abdud ke qatal se lashkar-e-kuffar ke hoslay mukammal tori tor gaye. Allah Ta’ala ne Musalmanon ki madad farmai aur aik aandhi aur sardi ki toofani raat ne un ke campon ko tos nis kar diya. Woh apne aap ko bacha kar bhaagnay par majboor ho gaye. Ghazwa e Khandaq Musalmano ki faisla kun fatah par muntaij hua, jis ka sahara sab se pehle Hazrat Ali (A.S) ki be-misaal bahaduri ke sar hai.

Yeh waqia na sirf aik jungi mubaraza tha, balkay Imaan o Tuheed aur Shirk o Kufr ke darmiyan aik alamti tasadum tha. Is ne Musalmano ke Imaan ko mazboot kiya, dushmanon ke dil mein rab paida kiya aur tareekh mein Hazrat Ali Murtaza Radi Allahu Anhu ke maqam o martabay ko hamesha ke liye roshan o tabnak kar diya.

Disclaimer (Ehtiyaati Elaan)

Ye maqala tareekhi aur mazhabi riwayat ki roshni mein tayyar kiya gaya hai. Qurra-e-Karaam se darkhwast hai ke darj zeel baaton ka khayal rakhein:

1. Makhaz: Ye tehreer Quran Pak ki aayaat, motabar ehadees ki kutub (jaise Sahih al-Bukhari, Sahih Muslim, Sunan Abi Dawood, waghaira), Seerat ki mustanad kitabon (jaise Al-Seerat al-Nabawiyyah li Ibn Hisham, Al-Raudh al-Unf, waghaira) aur motabar tareekhi masaadir se ikhraz karda maloomat par mabni hai.

2. Ikhtilaf-e-Riwayat: Baaz waqiat ke bayan mein moarrikheen aur muhaddiseen ke darmiyan ikhtilaf-e-riwayat paaya jata hai. Is tehreer mein un mein se zyada mashhoor aur mustanad riwayat ko hi paish kiya gaya hai.

3. Ghair Muslim Qurra: Ghair Muslim qurra se darkhwast hai ke woh isay ek mazhabi matan ki hesiat se parhein. Is mein bayan kardah waqiat aur aqaed Islam ke muqaddas aur bunyadi zarooor se ikhraz kardah hain.

4. Mazhabi Rahnumayi: Maqale mein bayan kardah fazaail o masaail ke baray mein kisi bhi qisam ki mazeed mazhabi rahnumayi ya tasdeeq ke liye apne maqami kisi motamad aalim-e-deen ya mufti se rujoo karna zaroori hai.

5. Niyat aur Adab: Ye tehreer ilmi faide, iman ko mazboot karne aur tareekh se sabaq hasil karne ki niyat se shaya ki gayi hai. Hamara maqsad kisi ke jazbaat ko thais pahunchana ya firqa warana munaafarat phailana hargiz nahi hai. Tamaam Sahabah Karaam aur Ahl-e-Bait Athaar se mohabbat aur adab har Musalman par farz hai.

6. Musannif ka Nuqta-e-Nazar: Ye tehreer musannif ki apni tehqeeq aur tafheem par mabni hai. Allah Tala se dua hai ke hamare tamaam aamaal khalsatan us ki raza ke liye hon aur hum se hone wali kotahiyon ko maaf farmaye.